دێرین ئانه‌ش سه‌لمنان که گه‌لوو کوردی گه‌لێوه قاره‌مان و وێبه‌ختکه‌ره‌ن و سه‌ره‌ڕاو سیاسه‌توو نکوڵی و قڕکه‌رده‌ی و به‌عه‌رب‌که‌رده‌ی و تورک‌که‌رده‌ی و فارسکه‌رده‌ی، به گردوو که‌م وکورتیه‌کاو وێشوه بیه‌ی وێش پارێزنان و جه لاپه‌ڕه‌و دێرینی‌نه نه‌سه‌ڕیانۆ. دایم ده‌وڵه‌ته داگیر‌که‌ره‌کێ واته‌نشا تۆ مه‌گه‌ر تورک بی، یان عه‌ره‌ب بی یان فارس بی مافوو مرۆڤێوه ئاسایی و مافوو ژیوای و مافوو هه‌موه‌ڵاتی بیه‌یت هه‌ن. ده‌وڵه‌ته زلهێزه‌کێ دنیایچ بێ مردامان فکریانه که چه‌نی و که‌ی و جه‌‌کۆوه جه ڕاو به‌رژه‌وه‌ندی رامیاری وێشانه کوردا پێسه‌و ئیمتیازێو به‌کار به‌را و گه‌مه‌کاشا قازانج که‌را. چینی سه‌رده‌ستوو کوردیچ، یانی به کرهاگیریاکێ کوردی جه راو به‌رژه‌وه‌ندی ته‌سکی حیزبایه‌تی و بنه‌ماڵه‌یی و تاکه‌که‌سی وێشانه دایم ئینه‌ی هه‌وڵوو هه‌ڕاجکه‌رده‌ی و بازرگانیکه‌رده‌ی گه‌لی مه‌ینه‌ت کۆڵوو کوردینه. یانی گه‌لوو کوردی ئینا ڕه‌وشێنه که نموونه‌ش جه هیچ لایه جیهانی و جه دێرینیچه‌نه نه‌وینیان و مه‌وینیۆ. گه‌لێوه گۆشه‌گیرکریا و ته‌نیان و پێسه‌و کۆمێوه تاوانباری و تێکده‌ری وینیۆ. ئی ڕه‌وشه‌یچ به درێژایی په‌نج هه‌زار ساڵێن ملۆ راوه و جه دژوو ئینه‌یچ، کوردێ به هه‌زار شه‌ڕ و شۆڕێ و کوشته‌ی و بڕیه‌ی و کۆچبه‌ر بیه‌ی و به هه‌زاران جۆرێ ته‌ری ته‌نیا تاوانشا وێشا پارێزنان و وێشا بیاونا سه‌ده‌و بیستوو یه‌که‌می.
سه‌رۆک ئاپۆ و حه‌ره‌که‌توو ڕزگاری نه‌ته‌وه‌یی کوردستانی، به درێژایی زیاتر جه 30 ساڵێ مۆداخله‌و ئی ڕه‌وشه‌یش که‌رده‌ن و ئارۆ گه‌لوو کوردیش ئارده‌ن تا ئا ڕاده که ئیتر ته‌نیا به وێپارێزنای رازی مه‌بۆ و کوشته‌ی و بڕیه‌ی پێسه‌و قه‌ده‌ری په‌سه‌ند مه‌که‌رۆ و به ده‌نگی به‌رز، په‌ی دونیای هاوار که‌رۆ و هه‌وڵوو دمائارده‌ی به چه‌مه‌ریه‌کا مد‌ۆ و گه‌ره‌کشا ده‌ستوو چاره‌سه‌ری دیمۆکراسی وئاشتیانه‌یش په‌ی درێژ کریۆ. که چی ده‌وڵه‌ته، به نامێ پارێزه‌ره‌کێ مافوو مرۆڤوو جیهانی و ده‌وڵه‌ته داگیرکه‌رکێ سه‌روو کوردستانی، نه ته‌نیا جوابوو ده‌سوو ئاشتی مه‌داوه، به‌ڵکی هه‌تا دمایی به وه‌حشیه‌تێوه گه‌وره و به شه‌ڕ و فشار جواب مداوه و گه‌ره‌کشانه ته‌سلمیه‌ت و نۆکه‌ری سه‌روو کوردیره سه‌پنا. ئینه‌یچ په‌یوه‌س به گه‌له‌کۆمه‌ی دلێوده‌وڵه‌تین و جه چوارچۆ گه‌له‌کۆمه‌یوه تازه‌ی به‌راش ڕاوه. هه‌ده‌فوو ئی گه‌له‌کۆمه‌یچه بێ‌ڕوومه‌ت که‌رده‌ی و ماڕای ئیراده‌و کوردی سه‌ربه‌وێن. یانی کوردی ئینکار مه‌که‌را، به‌ڵام چاره‌سه‌ری بێ سه‌رۆکی، بێ PKKی به بنه‌ما گێرا. مشیۆم بزانمێ ئانه چێوێ کوت و پڕ نیا. جه لایه‌وه هێرش که‌را سه‌روو گه‌ریلای و گه‌لی و چالاکیما و سه‌رۆکی و جه لایێ ته‌ریچه‌و کورده گۆش قوڵاخه‌کاو وێشا وزا دلێڕاسه‌و پرۆژێ وه‌رکه‌وته‌ی میانی گه‌وره‌ی و به‌ڵینه‌و ئاواکه‌رده‌ی ده‌وڵه‌تی به‌رژه‌وه‌ندی وازی و لکدریایی به وێشاوه په‌نه مدا.
پاسه دیاره‌ن ساڵه‌و 2006ی فره به گه‌رمی ویاریۆ و دوژمه‌ن شه‌ڕی هه‌مه‌لایه‌نه‌ش رایاونان و هه‌یتان هه‌یتان پێکش مارۆ. سه‌روو ئی بنه‌مایوه لازمه‌ن ئێمه‌یچ پێسه‌و گه‌لوو کوردی جه گرد لایه‌وه کۆششی هه‌مه‌لایه‌نه و به‌هێز په‌یره‌و که‌رمێ و ساڵه‌و 2006ی ته‌نیا پێسه‌و وێپارێزنای نه‌بۆ، به‌ڵکوو که‌رمێش ساڵه‌و دیاری که‌رده‌ی چاره‌نویسوو کوردا و چاره‌سه‌ری حه‌تمی که‌رمێ به هه‌ده‌فه. چی لایه‌نه‌و دابین‌که‌رده‌ی سه‌رکه‌وته‌ی ئیناره ده‌ستوو ئێمه‌نه. به مه‌رجێو، هه‌رکه‌س به کاروو وێش بزانۆ و جه شه‌ڕوو پارێزنا و ڕوومه‌تی و ئیراده‌و وێش و گه‌له‌که‌یش ئه‌رکوو وێش به یاگێ بارۆ. په‌ی یاگه‌ویاگه که‌رده‌و ئانه‌یچ لازمه‌ن هه‌ر تاکێوه کورد، هه‌ر ده‌زگا و ڕیکوسته و پارتیه‌وه، هه‌ر شار و ده‌گا و شاره‌چکه و شاره‌وانیه‌وه، هه‌ر چین و ده‌سه‌یه‌وه که وێش به مرۆڤ و به کورد مزانۆ، چی ساڵێنه ساحێبوو نه‌خشه‌ی و چالاکی بۆ و هه‌ده‌فوو ئی نه‌خشه‌یچه ته‌نیا و ته‌نیا ئازادی و سه‌رکه‌وته‌ی بنه‌ما گێرۆ. یانی ئیتر بێباوه‌ڕی و بن‌که‌وته‌ی نه، به‌ڵکوو مشیۆم جه سه‌ده‌و بیستوو یه‌کینه به کۆششی گه‌وهه‌ری وێما چاره‌نویسوو وێما دیاری که‌رمێ. مشیۆم جه ده‌می دوور و نزیکه‌نه یه‌رێ چێوێ که‌رمێ کۆڵه‌کێ سه‌ره‌کیێ چالاکییه‌کاما و گردوو هێز و ته‌وانا وبه‌هره‌مه‌ندیه‌کاما چا یه‌ره ڕه‌ینه وزمێ گێڵنای. یه‌که‌مشا مشیۆم پێسه‌و گه‌لوو کوردی و ژه‌ناو کوردی جه ڕاو ئازادی سه‌رۆک ئاپۆی به‌رده‌وام هه‌نگامه‌و “بێ‌سه‌رۆکی ژیوای مه‌بۆ” فاڕمێوه و ئی ڕاسیه‌کا جه چوارچوه و ئی دروشمێنه درکنمێ. په‌ی ئینه‌یچ مشیۆم هه‌ر ڕۆیه‌ما پێسه‌و 15و شوباتوو 1999 به ڕۆح و به گه‌رمی ویارمێ. به‌ڵام به شێوه‌یوه زانشتی‌ته‌ر و ڕیکوسته‌ته‌ر. چوون 15 و شوباتوو 1999 ی به‌ڕاستی شاهانه بێ و مرۆڤی کورد به ته‌مامی سه‌له‌مناش که سه‌رۆک ئاپۆ په‌ی ئادیشا راستیه‌وه ده‌ست ناسته و راستیه‌وه سه‌ره‌کی شه‌ڕی و ئاشتین. باوه‌ڕم هه‌ن جارێ ته‌ر جوابوو کوردا جه دژوو گه‌له‌کۆمه‌ی، گێڵۆوه په‌ی سه‌رده‌موو 15 و شوباتی و بێشهک ئینه فاڕیایه جدی جه ره‌وشوو سه‌رۆکینه وه‌ش که‌رۆ و تاومێ جه ده‌مێوه کورته‌نه زه‌مینه‌و ئازادی و سه‌ربه‌ستیچ دابین که‌رمێ. چوون رۆحوو وه‌روێدای و نه‌ته‌رسوو گه‌لوو کوردی جه 15 و شوباتوو 1999 ینه رۆحێوه بێ، که دونیا وه‌رانوه‌رشه‌و له‌رزا. پی بۆنه‌وه بانگ جه ته‌مامی گه‌لوو کوردی و جه هه‌ر چوار لاو جه‌هانی که‌روو که 15 و شوباتوو ئێساڵی که‌رمێ سه‌ره‌تایه‌وه تازه په‌ی کۆششی و ئازادیما.
دوومشا سه‌روو خه‌ته‌و پارێزنای ره‌وای، بێ ئانه‌ی ون مته‌ی مرۆڤی که‌رمێ هه‌ده‌ف و زه‌ره‌روو یه‌کیه‌تی به‌ینوو گه‌لا بده‌یمێ، شان به شانوو چالاکی وه‌روێدای و دیموکراتی، ژه‌نا و جوانا هه‌ریۆ پێسه‌و گه‌ریلایه روه‌و وێما که‌رمێ شاخه‌کاو جه شه‌ڕه‌که‌ینه هامکاری که‌رمێ و ما فوو جوابداوه‌ی ته‌نیا جه ””HPGی چه‌مه‌ڕوان نه‌که‌رمێ. سه‌رچه‌مێ مادیێ و مه‌عنه‌ویێ هێزه شه‌ڕوازه‌کا و ئا ده‌م و ده‌زگا ده‌وڵه‌تیا که جه قووڵكه‌رده‌ی بێچارهیی و قڕکه‌رده‌ی کوردا رۆڵشا هه‌ن که‌رمێ هه‌ده‌فوو چالاکییه‌کاما. مشیۆم جوانێ و ژه‌نی کوردی حه‌ر پاسه چێوه‌ڵی که‌رده‌نشا، ئارویچ تاوا جه چوارچۆ چالاکی نه‌رمینه ویاراشوو هه‌ریۆ پێسه‌و گه‌ریلایه شاری چالاکی شاری که‌را هه‌ده‌فه. چوون ئارۆ رۆ هه‌وڵی و هیمه‌تین و نیشتاره‌ی و لاوازی چالاکییه‌کاما هه‌زینه‌ی گه‌وره‌ما به‌رۆ و ئه‌نجامێوه که حه‌قما نه‌که‌رده‌ن، چه‌نی وێش مارۆ. چی وه‌خته‌نه په‌ی چالاکی ده‌رفه‌ت هه‌ن و ده‌وڵه‌ت ئینا دلێ له‌رزه‌ینه و ئاننه به هێز نیا، په‌وکی ئه‌گه‌ر چالاکی جه چوارچۆ پارێزنای گه‌وهه‌رینه ئه‌نجام بده‌یمێ، بێشهک ناچار بۆ که ئیمرالی که‌رۆ ئادره‌س و مۆخاته‌بوو وێش و ده‌ستوو ئاشتی په‌ی کورددا درێژ که‌رۆ. ده‌مێوه پاسه بی، ئانه پێسه‌و ژه‌نێ و پێسه‌و جوانوو کوردی همێد و خواستوو ئاشتیما به مه‌عنا بۆ. چوون ئاشتی ڕه‌نج و هه‌زینه‌ی گه‌وره‌ش گه‌ره‌کا.
جه نه‌خشه‌و چالاکییه‌کاو گه‌لینه کۆڵه‌کێ یه‌ره‌مینه پێش‌وسته‌ی و ڕیکوسته‌ی سیسته‌موو کۆنفێدڕالیزمی دیمۆکراتیکوو کوردستانین. که چی لایه‌نۆ ره‌خنه و سه‌رۆکی فره‌ن و ئیشاره به گران حه‌رکه‌ت که‌رده‌ی، دام و ده‌زگاو، ڕیکوسته به‌رپرسیاره‌کا که‌رۆ. پیمانه‌ی سه‌رکیه په‌ی جوابداوه‌و شه‌هیدا و په‌نه‌زانه‌ی به ڕه‌نج وکۆششوو به ساڵانوو گه‌له‌که‌یما و هامده‌م په‌یوه‌س بیه‌ی دایمیما به سه‌رۆکی، ئاواکه‌رده و سیسته‌می کۆنفێدالیزمین. چوون کۆنفیدڕالیزمی دیمۆکراتیک خه‌ته‌و چاره‌سه‌ری دیمۆکراسی بیه‌ی سیسته‌موو به‌ڕاوه‌به‌رده‌ی گه‌وهه‌ری گه‌لوو کوردین. ئه‌گه‌ر به‌ی و چی سیسته‌مه‌ی باش بیاومێنه و گردوو بواره‌کاش جه چیریوه په‌ی سه‌ری ڕیک وزمێ، به هیچ شێوه‌یوه ئه‌وه‌نجه‌ما مه‌گنۆ ده‌وڵه‌تی. ئه‌وه‌نجه پانه‌ی مه‌که‌رۆ که په‌ی به‌ده‌س ئارده‌و مافی زوانی و فه‌رهه‌نگی و شناسنامه‌ییما جه ده‌وڵه‌تی لاڵیه‌یمێوه. به‌ڵکوو مشیۆم ئانه‌ی جه وێما چه‌مه‌ڕایی که‌رمێ. ئه‌گه‌ر چی چوارچۆنه به‌شداربیه‌یوه گرده‌لایه‌نه یانی ڕامیاری و له‌شکه‌ری و ڕیکوسته‌یی و… ئه‌نجام بده‌یمێ، دڵنیه‌ینا که جه ده‌مێوه نزیکه‌نه ڕۆیه مه‌ی وه‌روه، ئازادی کوردا جه ئه‌دای بۆ. چه‌نی مه‌رحه‌له‌و چاره‌سه‌ری شۆڕشوو ژیواو نه‌ته‌وه‌ییما به سه‌رکه‌وته‌ی وست‌وه‌روه، ئانه ئارویچ به ڕه‌نج و ئیراده‌و وێما، بڕگێ چاره‌سه‌ری دیمۆکراتی سه‌ر وزمێ و دمایی به چه‌مه‌ریه‌ی نه‌ته‌وه‌یێما مارمێ.
منیچ پێسه‌و ڕۆڵێوه شمه په‌ی به‌شداربیه‌ی چالاکییه‌کاتا و ئه‌وه‌دای قه‌رزه‌کام به شمه‌ی ئازیزی، بێ مانیائه‌ژناسه‌ی سه‌روو یوه جه لووتکه به‌رزه‌کاو شاخه‌پیرۆزه‌کاو کوردستانیوه سه‌ختی و حه‌دی وه‌شکریا دوژمنی که به‌ین و گه‌لی و گه‌ریلاینه وه‌شکریان، جه دلێ سه‌رداوسۆڵه‌و زمسانی په‌ڕ زه‌حمه‌تینه به‌زنوو و گه‌ره‌کما به چالاکییه ئاورین په‌یوه‌س‌بیه‌ی و ڕاست واچی گه‌ریلایتا په‌نه بیاونوو و مزانی و په‌یامه‌و ئانه‌ی بده‌و که سه‌ره‌ڕاو گردوو که‌م و کورتیه‌کاما تا زه‌ڕێوه فیکر و رۆحوو کوردایه‌تی و PKK””ی‌ما چه‌نه بۆ، سه‌ما ئاسا و سه‌ردار ئاری ئاسا به ئیراده و به بڕیار، په‌ی وێ فه‌داکه‌رده‌ی ئامادێنمێ و سه‌رکه‌وته‌ی ژیوایه په‌ڕ جه ئاشتی و ئازادی فره دوور نیا. ئه‌گه‌ر دووریچ بۆ، هه‌رگیز زه‌مان مه‌تاوۆ باوه‌ڕ وئیراده‌و کۆششما به‌زنۆ. جه دمایینه فره وه‌شحاڵه‌نا که رۆڵێ گه‌لێوه پێسه‌و شمه‌نا.
په‌ی گه‌لوو کوردی جه واکوور و کوردستانی
فره به حه‌سره‌ته‌وه بێنا که ڕوێ به‌ی، جه شاخه‌کاو واکوور و کوردستانیوه وه‌زووره واری و ڕووه‌و گه‌رمایی سه‌رهۆردانه‌کاو شمه گنوو ڕا. گردوو همێدی و ئاواته‌م ئانێ بێ که به ئازادی و دلێ هه‌وایه ئاشتیانێنه به زبان و فه‌رهه‌نگ و شناسنامه‌ی نه‌ته‌وه‌یی وێتا، مرۆڤ ئاسا ژیوایه‌ندێ. چانه‌ین من پێسه‌و شه‌خسی نه‌وینووش، به‌ڵام جه ئیساوه هه‌ست پی ڕاس‌یه که‌روو و باوه‌ڕم په‌نه‌شه‌ن. زاته‌ن ویناو ئێمه فره مۆهێم نیا. به‌س پا شه‌رتێ ئا زاڕۆڵێ که به ده‌سه گولانه‌کاشا درکی مشانا په‌ی ئا “شه‌وێ،” که وه‌رم و خیاڵه ڕه‌نگاڕه‌نگه‌کاشا شێونۆ و دماڕۆیشا سیاو که‌رۆ ویناش. سه‌رۆک ئاپۆ نزیکوو شمه‌ن و فره به شانسێندێ. به‌ڵام مزانوو باریچتا فره گرانه‌ن. چوون ئاد ته‌نیا ڕابه‌روو گه‌لێوه نیا. به‌ڵکوو ئه‌مانه‌توو مرۆڤایه‌تی و دێرینین. په‌وکی ئازاد که‌رده‌ی و پارێزنایش فره زه‌حمه‌تا. مانیا نه‌ژناسه‌ی و کۆششوو شمه‌یچ بێمدرامان چینه‌یوه سه‌رچه‌مه گێرۆ. په‌وکی پیرۆزا. منیچ چه‌نی ڕه‌خنه‌داو وێم جه وه‌راوه‌روو شمه‌وه، پیرۆزباییتا چه‌نه که‌روو. همیدواره‌نا چیوه‌دمای به هه‌ڵمه‌ته‌و گلێروه‌که‌رده‌و ئیمزای په‌ی ڕێفراندۆمه‌و دیموکراتی گه‌لوو کوردی و گردوو چالاکییه دیموکراتییه‌کا ته‌ری، بڕگێ چاره‌سه‌ری دیمۆکراتی قازانجه که‌رمێ. جه دمایینه بانگ جه ته‌ماموو گه‌لی وه‌شه‌ویسیم که‌روو که جه ده‌ور و به‌روو سه‌رۆک ئاپۆی و ده‌م و ده‌زگاکاو ڕیکوسته‌که‌یما گلێر بۆوه؛ و هیچ که‌س و گرووپ و تاقمێوه، بێ‌همێدی و لاوازی، نه‌که‌رۆ ئاسته‌نگ و ته‌نیا و ته‌نیا چه‌مما جه سه‌رکه‌وته‌ی بۆ.
په‌ی گه‌لوو کوردی جه واشووروو کوردستانی
وه‌ڵێو گرد چێوی دلێ جه‌رگه‌و کوه سه‌رکه‌شه‌کاو کوردستانیوه پێسه‌و کناچه گه‌ریلایه سڵام و حورمه‌ت و دڵسۆزی وێم پێشکه‌شتا که‌روو. هامده‌میچ وه‌شحاڵه‌نا و جه کانگاو دڵیوه پیرۆزبایی ئا سه‌رکه‌وته‌یه و ئا ده‌سکه‌وته دێرینه‌و ئارۆ واشووروو کوردستانیتا چه‌نه که‌روو که به‌رهه‌موو ونه‌و هه‌زاران شه‌هیدی و حه‌رپاسه ڕه‌نج و کۆششوو سه‌دان ساڵه‌و گه‌له‌که‌یمانه. ئا پێشکه‌وته‌یه ئارۆ جه کوردستانه‌نه هه‌ن و شمه‌ی نیشتمان په‌روه‌ر په‌نه‌ش دڵوه‌شێندێ، به هه‌زینێ فرێ و قۆربانی گه‌ورێ، پێسه‌و هه‌ڵه‌بجه‌ی و ئه‌نفالی و به ده‌ربه‌ده‌ری و کوشته‌ی و بڕیه‌ی به ده‌س ئامان. حه‌ر په‌وکی پارێزنای و وه‌رگیری که‌رده‌ی جه به ئیراده‌بیه‌ی گه‌لوو کوردی جه پرۆسێ دیمۆکراتیزه‌که‌رده‌ی ئێراقی و ئاوا که‌رده‌ی سیسته‌می تازه‌و ده‌وڵه‌تی، ئه‌رکوو هه‌ر کوردێوه به شه‌ره‌فی و به نامووسین و دژایه‌تی که‌رده‌یچش به ماناو نیازخرابین. ئه‌چێنه خاڵه‌ی فره مۆهێمه ئانێنه که گه‌له‌که‌ما به ئه‌وپه‌ڕوو هه‌ستیاری و هوشیاریوه ئا ده‌سکه‌وتاو وێشه پارێزنۆ و هه‌وڵوو پێشکه‌وته‌یشا بدۆ. چوون مشیۆ باش بزانمێ، که هه‌ڵای جه کوردستانه‌نه و هه‌رێمه‌که‌نه به گردی هه‌ڕه‌شی شه‌ڕ و شۆڕی و پیلانه هه‌ڕینه‌کێ دووژمه‌نی سه‌روو گه‌لوو کوردیوه نه‌نریه‌ینێ لاوه و ئه‌وه‌نجه به هه‌ڵویستی گرده‌لایه‌نه‌ی هه‌ن.
ده‌سه‌ڵاته وه‌رئاوایه‌کێ به‌گردی و ئامریکایه‌کێ به تایبه‌تی سه‌ره‌ڕاو ئانه‌ی که جه وییه‌رده‌نه وێشا بیه‌نێ به سه‌به‌بوو وه‌ش‌بییه‌و کێشکاو کوردستانی، ئارۆ بێشه‌رمانه پییاوه‌تی سه‌روو ره‌نجوو گه‌لی و ونه‌و شه‌هیده‌کاماوه که‌را. وێشا به ساحێب و ئافه‌رینه‌روو ده‌سکه‌وته دێرینه‌کاو ئارۆ کوردستانی مزانا و گه‌ره‌کشانه واشووروو کوردستانی که‌را قه‌ڵایه‌وه په‌ی پارێزناو به‌رژه‌وه‌ندییه رامیاریه‌کا وێشا، جه وه‌رکه‌وته‌ی میانینه. یانی جه لایه‌وه ئینه‌ی شۆنه‌و ئا فڕ و فێڵه‌یره چه‌نی و که‌ی و جه کۆوه کوردێ واشووری به دژوو ده‌وڵه‌تهایه‌وه پێسه‌و تورکیه‌ی و سووریه‌ی و ئێرانی به‌کار به‌را و جه لایه‌‌ته‌ریچۆ په‌ی ئانه‌ی کوردێ چا حه‌د و مه‌رزه‌ی ئادیشا نیانه‌ره نه‌ترازیا و چیری کۆنترۆڵوو وێشانه با، هه‌وڵوو ئانه‌ی مدا که واشووروو کوردستانی که‌را به دامێوه په‌ی کوردا و پارچه‌کاته‌روو کوردستانی و پینه‌یچ کوردا بدا گژوو یویره و دژ به یۆت‌رینی به‌کارشا بارا. جه لایه‌وه””PKKی وزا لیستوو ترۆری و سه‌رۆک ئاپۆی وزا زیندان و جه لایه‌ته‌ریچوه په‌ی سه‌رۆکوو پارتیه‌کاو واشووری و فیدراسیۆنه‌و کوردا ماچا ” ئه‌رێ.” ئانه چێوێ کوتووپڕ نیا و مشیۆ باش وینیۆ و ئێمه پێسه‌و گه‌لوو واشووری په‌سه‌ندش نه‌که‌رمێ. ده‌وڵه‌ته‌کێ تورکیه‌ی و سووریه‌ی و ئێرانی دایم ئینای هه‌وڵوو دلێ به‌رده‌و ئه‌زموونوو واشووروو کوردستانینه و جه سیاسه‌توو دژایه‌تی که‌رده‌ی و دوژمنایه‌تی پاشگه‌زێ مه‌باوه. حه‌رچی هێزێ ده‌سه‌ڵاتدارێ کورداچه‌نێ، به تایبه‌ت چینی سه‌رده‌ست و به‌رژه‌وه‌ندی په‌ره‌ست و حیزبه بنه‌ماڵه‌یه‌کێ، چیروو نامێ ڕامیاری کوردایه‌تینه ڕووه‌و وێشا پۆژنه‌ینه‌ره و بازرگانی به ونه‌و گه‌لیوه که‌را. جه جه بڕگه‌یوه ئه‌پێسنه چاره‌نویس ساز و مۆهێمه‌نه، که جه هه‌ر چوار پارچه‌و کوردستانینه و به تایبه‌ت جه واکووروو کوردستانینه گفتوگۆ سه‌روو ئانه‌یه کریۆ، که دیالۆگوو چاره‌سه‌ری ڕامیارانه‌و کێشه‌و کوردی کریۆ، واته‌و به‌ڕێز “مام جه‌لال”ی که به تورکیای و ئامریکای ماچۆ: ”با “ئاپۆ”ی بێده‌نگ که‌را،” عه‌یبێوه فره گه‌وره‌ن و مشیۆم په‌سه‌ند نه‌کریۆ. ئیتر شه‌رمه‌ن په‌ی کوردا، جه دژوو یوته‌رینی پیلان و ته‌ڵێ بنیاره. چوون لاوازی کوردوو هه‌ر پارچه‌یوه جه کوردستانی بۆ به لاوازی ته‌ماموو کوردستانی و چاره‌نویسوو هه‌رچوار پارچه‌و کوردستانی پێسه‌و گۆشتی و ناخوونی پێوه لکه دریان. به تایبه‌ت حه‌رتا کێشه‌و کوردی جه پارچه‌ی گه‌وره‌و کوردستانی یانی واکووره‌نه چاره‌سه‌ر نه‌کریۆ، مۆمکین نیا کوردێ پارچه‌کا ته‌ری به شه‌ره‌ف و به ئازادی بژیوا. سه‌روو ئی بنه‌مایوه بانگ جه ته‌مامی گه‌لوو کوردی جه واشووروو کوردستانی که‌روو که بێده‌نگی و بێ‌به‌رپرسیاری جه وه‌راوه‌روو شۆڕشوو واکووروو کوردستانیوه په‌سه‌ند نه‌که‌را. چوون بێده‌نگی بۆ به هۆ مه‌رده‌ی و به مه‌رده‌یی جه ئه‌دا بیه‌ی و به بێ ئیراده بیه‌ی، عه‌مروو ده‌سکه‌وتی تازه‌و کوردی جه واشووره‌نه فره درێژه مه‌کێشۆ. په‌ی ئانه‌یچ با گرد یۆوه ژه‌ن و زاڕۆ و پیر و جوان و گردوو ڕۆشنویرا ده‌نگوو وێشا به ڕێفراندۆمه‌ی دیموکراتیانێ پارێزناو سه‌رۆک ئاپۆێ و په‌سه‌ند که‌رده‌یش پێسه‌و ئیراده‌ی سیاسی کوردی بدا. به گردوو هێزی و ته‌وانایه‌کاشاوه په‌شت‌گیری وێشا جه چالاکییه‌کا گه‌لی جه گردوو پارچه‌کاته‌ری کوردستانی که‌را. چی لاینه‌و، ویر و باوه‌ڕوو من به ڕۆحوو وه‌روێداو گه‌له‌که‌یم هه‌ن. چوون گه‌لوو واشووری گه‌لوو وێبه‌ختکه‌رده‌ی و گه‌لوو هه‌ڵه‌بجه‌ی و گه‌لوو سه‌رهۆرداو ئازادین. منیچ پێسه‌و کناچێوه شمه نزیک به ده ساڵێن به فه‌رهه‌نگوو وێوه‌ردای، که جه شمه‌وه هۆرمگێرته‌ن و ئا زانیاریا و ئا ئیراده‌یه که جه سه‌رۆک ئاپۆی و ””PKKی و حه‌ره‌که‌توو ئازادی ژه‌نه‌ی کوردێ هۆرمگێرته‌ن، جه شاخه‌کاو کوردستانیوه هه‌نا هه‌وڵ و کۆششه‌نه په‌ی ئازادی گه‌لوو کوردی و ژه‌نه‌ی کوردێ.
گردوو هه‌وڵ و همێدم ئازادی گه‌لوو کوردی جه هه‌ر چوار پارچه‌ین و دیمۆکراتیزه‌بیه‌ی و ئازادی زێهنیه‌تین جه واشوورو کوردستانی و دما ئارده‌ی به وێکۆشته‌ی و بێچارهیی و کۆیلایه‌تی ژه‌نێ و به‌رشیه‌ی جوانا جه وه‌ڵاتوو وێشا و گردوو کێشه کۆمه‌ڵایه‌تیه‌کا ته‌ری. جه سه‌روو ئی بنه‌مایوه گه‌ره‌کما ئارۆ به چالاکییه گیانبازی خواستوو وێم په‌ی په‌یوه‌س بییه‌ی پی هه‌ده‌فیوه نیشانه بده‌و و په‌یامێوه به شمه‌ی ئازیزی بیاونوو. ئی چالاکییه‌و منه پێسه‌و وێکوشته‌ی ئا ژه‌نا نیا که جه بێزاری و بێچاره‌ییوه سه‌رچه‌مه‌ش گێرته بۆ. به‌ڵکێ چالاکین جه پاو عه‌شق به ژیوای و پێش وسته‌ی زێهنیه‌توو چالاکی ئازادین و درێژه‌دای به فه‌رهه‌نگوو وه‌روێداو ژه‌نایه پێسه‌و “له‌یلا قاسم”ێ و “زیلان”ێ و “سه‌ما یۆجه”کان. چن وه‌شحاڵه بوو پانه‌ی که ئی په‌یام و چالاکییه‌م بیاوۆ گۆشوو ته‌ماموو گه‌لوو کوردی و لانیکه‌م هێزێوه بده‌و به کۆششی و جم و جووڵی تازه‌ی دلێ گه‌لوو واشووروو کوردستانینه.
جه کۆتایینه پێسه‌و کادرێوه ژه‌نه‌و واشووروو کوردستانی ره‌خنه‌دانوو وێم مده‌و. چوونکه پێسه‌و ئه‌وه‌نجه‌ی پێشاهه‌نگیه‌وه به هێزم به ئه‌نجام نیاونا و سه‌رۆک ئاپۆ و ئیدئۆلۆژی ڕزگاری ژه‌نێ که ئیدئۆلۆژی شۆڕشی کۆمه‌ڵایه‌تی واشوورین، به باشی په‌نه‌م نه‌ژناسنه‌ی.
– بژیوۆ ڕابه‌ر ئاپۆ
– بژیوۆ PKK و PAJK
– بژیوۆ KJB و KKK
– بژیوۆ HPG و YJA-STAR
– بژیوا گردوو شه‌هیداو ڕاو ئازادی
– بمرۆ خه‌یانه‌ت و گه‌له‌کۆمه‌ی دلێ‌ده‌وڵه‌تی
– بمرۆ گرد جۆره دماکه‌وته‌یی و ده‌سه‌ڵاتداری
چه‌نی سڵام و حورمه‌تیم
1 شوباتوو 2006
VIYAN.info